Sanaysay

Kahulugan at Bahagi

1. Ang sanaysay ay isang maiksing komposisyon na kalimitang naglalaman ng

personal na kuru-kuro ng may-akda.
2. Ang sanaysay ayon kay Alejandro G. Abadilla ay “nakasulat na karansan ng
isang sanay sa pagsasalaysay.” Ang sanaysay ay nagmula sa dalawang salita:
ang sanay at pagsasalaysay. Ito ay panitikang tuluyan na naglalahad ng kuru-
kuro, damdamin, kaisipan, saloobin, reaksyon at iba pa ng manunulat hinggil sa
isang makabuluhan, mahalaga at napapanahong paksa o isyu.
3. Mahalaga ang pagsusulat at pagbabasa ng sanaysay sapagkat natututo ang
mambabasa mula sa inilahad na kaalaman at kaisipang taglay ng isang
manunulat. nakikilala rin ng mambabasa ang manunulat dahil sa paraan ng
pagkasulat nito, sa paggamit ng salita at sa lawak ng kaalaman sa paksa.
4. Ayon sa Tuklas 3 (Libro sa Filipino):
Ang sanaysay ay isang akdang pampanitikan na nasa anyong tuluyan. Ito ay ang
paglalahad ng matalinong opinyon ng sumulat/may-akda, base sa kanyang:
            a. Damdamin
            b. Karanasan
            c. Kaalaman
            d. Haka-haka/Opinyon
Anumang bagay ay maaaring paksain sa pagsulat ng sanaysay.
5. Ayon sa Diksyunaryo:
Ang sanaysay ay may natatanging paksa na hight na maikli at pormal kaysa sa
alinmang akda; pagtataglay ng paniniwala, pananaw at kaisipan ng sumulat
6. Ayon kay Dr. Samuel Johnson:
Ang sanaysay ay isang malayang igpaw ng pag-iisip.
7. Ayon kay Alejandro Abadilla
Ang sanaysay ay ang pagsasalaysay ng isang sanay o nakasulat na karanasan
ng isang sanay sa pagsasalaysay
8. Ayon kay Genovera E. Matute

Page 1 of 13
 Ang sanaysay ay ang pagtalakay sa isang paksa sa paraang tuluyan at sa
malayang paraang naglalantad ng kaisipan, kuru-kuru, palagay at ng kasiyahan
ng sumusulat upang umaliw, magbigay kaalaman o magturo.

Dalawang uri ng sanaysay

1. Pormal o Maanyo

Ang sanaysay na pormal o maanyo - sanaysay na tinatawag din na impersonal -

kung ito'y maimpormasyon. Naghahatid ng mahahalagang kaisipan o kaalaman sa
pamamagitan ng makaagham at lohikal na pagsasaayos ng mga materyales tungo sa
ikalilinaw ng pinakapiling paksang tinatalakay.Maanyo rin ito kung turingan sapagkat
ito'y talagang pinag-aaralan. Maingat na pinili ang pananalita kaya mabigat basahin.
Pampanitikan kasi kaya makahulugan, matalinhaga , at matayutay. Mapitagan ang tono
dahil bukod sa ikatlong panauhan ang pananaw ay obhektibo o di kumikiling sa
damdamin ng may-akda. Ang tono nito ay seryoso, paintelektuwal, at walang halong
pagbibiro.

Pormal – sanaysay na tumatalakay sa mga seryosong paksa at nangangailangan ng

masususing pag-aaral at malalim na pagkaunawa sa paksa; inaakay ng manunulat ang
mambabasa sa malalim na pag-iisip upang makabuo ng sariling pagpapasya at kumilos
pagkatapos

2. Impormal o Di-pormal

Ang sanaysay na impormal o di-pormal ay mapang-aliw, nagbibigay-lugod sa

pamamagitan ng pagtatalakay sa mga paksang karaniwan, pang araw-araw at personal
o isyung maaaring magpakilala ng personalidad ng manunulat o pakikisangkot niya sa
mga mambabasa. Idinidiin nito dito ang mga bagay-bagay ,mga karanasan ,at mga
isyung bukod sa kababakasan ng personalidad ng may-akda ay maaaring empatihayan
o kasangkutan ng mambabasang medya. Ang pananalita ay parang pinaguusapan
lamang, parang usapan lamang ng magkakaibigan ang may-akda, ang tagapagsalita at
mga mambabasa at ang tagapakinig , kaya magaan at madaling maintindihan.
Palakaibigan ang tono nito kaya pamilyar ang tono dahil ang paunahing gamit ay unang
panauhan. Subhektibo ito sapagkat pumapanig sa damdamin at paniniwala ng may-
akda ang pananaw.

Di-Pormal – sanaysay na tumatalakay ng mga paksang magaan, karaniwan, pang-

araw-araw at personal; binibigyang-diin ng manunulat ang mga bagay-bagay, mga
karanasan o isyung maaaring magpakilala ng personalidad ng manunulat o
pakikisangkot niya sa mga mambabasa

Sangkap ng Sanaysay
Page 2 of 13
  1.        Tema at Nilalaman – anuman ang nilalaman ng isang sanaysay ay itinuturing
na paksa dahil sa layunin sa pagkasulat nito at kaisipang ibinahagi

2.        Anyo at Istruktura – ang anyo at istruktura ng sanaysay ay isang

mahalagang sangkap sapagkat nakaapekto ito sa pagkaunawa ng mga
mambabasa; ang maayos at lohikal na pagkasunud-sunod ng ideya o
pangyayari ay makatutulong sa mambabasa sa pagkaunawa sa sanaysay

3.        Wika at Istilo – ang uri at antas ng wika at istilo ng pagkakagamit nito ay
nakaaapekto rin sa pagkaunawa ng mambabasa; higit na mabuting
gumamit ng simple, natural at matapat na mga pahayag

 Tatllong (3) Bahagi ng Sanaysay

1. Panimula o Simula (Introduction)

1.1. pinakamukha ng sulatin
1.2. kailangang kaakit-akit, nakakapukaw, nakakaganyak, nakakahatak ng
kuryusidad
1.3. pinakamahalagang talata sa isang sulatin dahil dito nakasalalay ang tagumpay o
kabiguan ng akda
1.4. – Ito ang pinakamahalagang bahagi ng isang sanaysay sapagkat ito ang unang
tinitingnan ng mga mababasa, dapat nakapupukaw ng atensyon ang panimula
upang ipagpatuloy ng mambabasa ang pagbasa sa akda.
1.5. – Ito ang unang sinusulat sa isang sanaysay. Ito ay dapat nakakakuha ng
attention ng bumabasa para basahin niya ang natitirang bahagi ng sanaysay.
Maaari itong isulat sa mga paraang sumusunod:
       a) Pasaklaw na Pahayag - Inuuna ang pinakamahalagang impormasyon
hanggang sa mga maliliit na detalye (inverted pyramid)
       b) Tanong na Retorikal - Isang tanong na tinatanong ang nagbabasa para
hanapin ang sagot sa sanaysay at para isipin niya.
       c) Paglalarawan - Pagbibigay linaw at "descriptions" sa paksa.
       d) Sipi - Isang kopya o copy galing sa ibang mga literaturang gawa gaya ng
libro, artikulo, at iba pang sanaysay.
       e) Makatawag Pansing Pangungusap - Isang pangungusap na makakakuha
ng atensyon ng nagbabasa.

Page 3 of 13
        f) Kasabihan - Isang kasibahan o salawikain na makakapagbigay ng
maikling explanasyon ng iyong sanaysay.
       g) Salaysay - Isang explanasyon ng iyong sanaysay.

Iba’t Ibang Paraan ng Pagsulat ng Panimula:

a. Pasaklaw na Pahayag - resulta o kinalabasan muna ang sinasabi bago isa-isahin at

pagsunud-sunurin mula sa di-gaanong mahalaga hanggang sa pinakamahalaga ang mga detalye

- karaniwang makikita sa sa araw-araw na binabasang mga balita bilang pamamatnubay

- agad - agad matatagpuan ang bawat kasagutan sa mga katanungang Ano? Sino? Bakit? Saan?
Kailan? at Bakit?

Halimbawa:

Isang binatang gurong dumalo sa kaarawan ng kanyang kaibigan ang brutal na pinatay makaraang
saksakin ng apatnapu’t pitong beses ng apat na estudyanteng nainis sa ginawang pagbati ng una
kamakailan sa Santo Tomas, Batangas.

b. Tanong na Retorikal

Halimbawa:

Madalas na marinig natin ang ang pagtatalo tungkol sa kabataan ng kahapon at ng kasalukuyan.
Nahahati sa dalawang pangkalahatang pangkat ang pagtatalo: ang panig ng kabataan kahapon at ang
panig sa kabataan ng kasalukuyan. Ang suliranin ay “Higit na magaling ang kabataan noon kaysa
kabataan ngayon.” Sumasang-ayon ka ba?

c. Sipi

Halimbawa:

Si Rizal ay nagsabi sa pamamagitan ng bibig ni Isagani sa “El Filibusterismo” ng ganito: “ Kung

ako’y magkaroon na ng ganyang mga uban, Ginoo, at kung sa paglingon ko sa nakalipas ay makita kong
ang aking ginawa ay para sa aking kapakanan at wala akong ginawa para sa bayang nagbigay sa akin ng

Page 4 of 13
lahat, para sa mga mamamayang tumulong sa akin upang ako ay mabuhay; sa gayon, Ginoo, ang bawat
ubang iyan ay magiging tinik at sa halip na ikarangal ay aking ikahihiya.”

d. Paglalarawan - ginagamit kapag nagtatampok ng tao. Sapagkat nagbibigay-deskripsyon,

mga malarawan at maaksyong salita ang ginagamit.

Halimbawa:

Si Rosella yata ang pinakamabait sa klase. Malawak ang kanyang pang-unawa. Mapagbigay at
maalalahanin siya lagi. Tapat na tapat siyang makisama. Lamang, hindi siya masalita. Parang laging
napakalalim ng iniisip. Ang pagiging walang kibo niya’y hiwagang pinagkakatingihan ng lahat.

e. Makatawag-pansing Pangungusap - ito’y isang mapanggitlang panimula dahil di

karaniwang sinasabi o naririnig sa araw-araw ang pamamariralang ginagamit dito.

Halimbawa:

Masarap ang magmeryenda sa CR!

f. Salawikain o Kasabihan

Halimbawa:

“Ang kaibigan ay nagmamahal sa lahat ng panahon at sa oras ng kagipita’y kapatid na

tumutulong.”

g. Salaysay

Halimbawa:

Samantalang nakasakay ako sa taksi patungo rito sa inyong paaralan, iba’t ibang tagpuan ng mga
kabataan ang nasaksihan ko: mga babae’t lalaking nagdudumaling naglalakad na may hawak na mga
aklat; mga nagtitinda ng sigarilyo at diyaryo; mga batang nanglilimahid na nagtutulak ng kariton ng mga
basura’t kalawanging kagamitan; mga kabataang lalaking nangakatayo sa bangketa; mga kabataang
sumisigaw at may dala-dalang plakard; mga nanonood sa mga bilyaran at iba pang libangan; at mga
basta’t naglalakad na tila namasyal lamang at marami pang ganito’t gayong tagpo ng kabataan at bigla, sa

Page 5 of 13
isip ko, naitanong ko: sino kaya sa mga kabataang iyon ang maibibilang sa mga kabataang nag-aangkin
ng kamalayang pambansa?

2. Katawan o Gitna
2.1 dito makikita ang mga kaalaman
2.2 binubuo ito ng mga talatang kinapapalooban ng mga pangunang kaisipan at
mga pantulong o pamunong mga detalyeng maayos maayos ang masuring
pagkakauri-uri at pagkakasama-sama at makatwiran ang pagkakahanay-hanay
at pagkakasunud-sunod tungo sa malinaw na ikapaliliwanag ng paksa
2.3 – Sa bahaging ito ng sanaysay makikita ang pagtalakay sa mahahalagang
puntos ukol sa tema at nilalaman ng sanaysay, dapat ipaliwanag nang mabuti
ang bawat puntos upang maunawaan ito nang maigi ng mambabasa
2.4 - Dito nakalagay ang lahat ng iyong mga ideya at pahayag. Maaari itong isulat
sa mga paraang sumusunod:
       a) Pakronolohikal - Nakaayos ayon sa panahon ng pangyayari.
       b) Paanggulo - Pinapakita ang bawat angulo o "side" ng paksa.
       c) Paghahambing - Pagkukumpara ng dalawang problema, angulo atbp ng
isang paksa.
       d) Papayak o Pasalimuot - Nakaayos sa paraang simple hanggang
kumplikado at vice versa.

Iba’t Ibang Paraan ng Pagsulat ng Katawan/Gitna

a. Pakronolohikal - ayon sa tamang pagkakasunud-sunod ng mga pangyayari mulang

pinakamatagal hanggang sa pinakakasalukuyan

b. Paanggulo - ibinabatay sa personal na masasabi o reaksyon ng bawat tao tungkol sa mga

bagay-bagay o isyu tungo sa isang obhektibong paglalagom

- sa pamamagitan ng pagtitimbang-timbang sa bilang ng reaksyong nakuha, ang konklusyon ay

madaling magagawa

Page 6 of 13
 c. Paghahambing - sa unang seksyon sisimulan muna ang ang pagkakaiba tungo sa ikalawang

seksyon na ang mga pagkakapareho naman

d. Papayak/Pasalimuot -sinisimulan itong iayos sa mga bagay na komplikado kasunod ang

mga bagay na simple o vice-versa

3. Wakas (Konklusyon)
3.1 – nagsasara sa talakayang naganap sa katawan ng sanaysay; sa bahaging ito
nahahamon ang pag-iisip ng mambabasa na maisakatuparan ang mga tinalakay
ng sanaysay
3.2 – Dito nakalagay ang iyong pangwakas na salita o ang buod sa sanaysay.
Pwede itong isulat sa paraang
a) Tuwirang Sinabi - Mensahe ng sanaysay
b) Panlahat ng pahayag - Pinakaimportanteng detalye ng sanaysay
c) Pagtatanong - Winawakas ang sanaysay sa pamamagitan ng isang (retorikal
na) tanong.
d) Pagbubuod - Ang "summary" ng iyong sanaysay.

Iba’t Ibang Paraan ng Pagwawakas:

a. Tuwirang sinabi

Halimbawa:

Mula ngayon at di na magtatagal ang bukambibig na sabi ni Jose Rizal na, “Ang kabataan ang
pag-asa ng bayan” ay mapapatunayan na.

b. Panlahat na Pahayag

Halimbawa:

Makabuluhan, samakatuwid, ang palasak nating kawikaang “ Ang hindi lumingon sa

pinanggalingan ay hindi makararating sa paroroonan.”

c. Pagtatanong
Page 7 of 13
Halimbawa:

Ano pa ang ating hinihintay? Magtatamad-tamaran na lamang ba tayo habang buhay? Kailan
natin bubuksan ang pinto ng maunlad na kinabukasan?

d. Pagbubuod - pinakagamitin sa pagwawakas

Halimbawa:

Marahil, sa atin, napakaliit ng P50. Kulang pa ngang pambili ng quarter pounder sa Mc Do. Pero
sa mga kasama nating manininda, isang puhunan na iyon para may makain bukas .

Katangiang Dapat Taglay ng isang Mabuting Mananaysay

 May malawak na kaalaman o karanasan sa paksa

 Nagagamit ang wika nang wasto at mabisa
 Nakapipili ng mabuti at mabisang istilo ng paglalahad ng ideya
 Malinaw at hindi madamot o matipid sa pagpapaliwanag ng kaisipan at kaalaman
ukol sa paksa
 May kakayahang pumukaw o manghikayat ng mambabasa

Mga Halimbawa ng Sanaysay

Pormal

MAYO 31 - "WORLD NO-TOBACCO DAY'

Page 8 of 13
 Mahigit sa apat na dekada na ang nakararaan, nang nagaluntang ang mundo sa
isang balitang pang mediko sa posibleng panganib sa kalusugan ng tabako. Mula noon,
napatunayan na ang tabako ay isang panganib na may kinalaman sa may 25 na sakit
kabilang na ang kanser, sakit sa puso, atake, at peptic ulcer.
Walang alinlangan na alam na natin ngayon na ang paggamit ng tabako ay
naging dahilan - at patuloy na nagiging dahilan - ng kamatayan at sakit sa malawakang
antas. Sa mga papaunlad na bansa lamang, ang mapanganib na mga epekto ng tabako
ay dahilan ng kamatayan ng hindi kukulangin sa 60 milyong tao bawat taon. Kung
magpapatuloy ito sa 2020, ang bilang ng kamatayang ito ay aabot sa 10 milyon bawat
taon. Karamihan sa mga kamatayang ito ay nagaganap sa mga papaunlad na bansa na
ang 48 bahagdan ng kalalakihan at 7 bahagdan ng kababaihan ay naninigarilyo.
Ang paggamit ng tabako ay nakarating na sa nakatatakot na proporsyon at
walang sinumang tao, organisasyon o gobyerno ang makapipigil sa panganib na ito
nang nag-iisa. Alam ang bagay na ito ng World Health Organization (WHO), ilang taon
na ang nakalipas ng idineklara ang Mayo 31 ng bawat taon bilang World No-Tobacco
Day. Ito ang paraan ng WHO sa panawagan ng lahat ng kasaping bansa na himukin
ang mga gumagamit ng tabako na sa isang araw man lamang ay huwag manigarilyo o
yumigil na para sa kanyang kabutihan.
"Itigil na paninigarilyo simula ngayon".Iyan ang layunin ng World No-Tobacco
Day.
(mula sa Balita, Mayo 1997).

Di-Pormal

Ikaw…..Lamok

Ni Nelly V. Magabulo

Page 9 of 13
 Isang malalim na gabi'y napagmasdan kita. Hindi ako makatulog noon kaya
binuksan ko ang ilaw. Nakita kitang aali-aligid sa katawan ng kapatid ko. Pinilit kitang
huliin ngunit hindi ko nagawa. Ginawa ko ito dahil alam kong mamaya lamang ay
sisipsip ka ng dugo sa kanya. Pinabayaan kita. Nahiga uli ako at nag-isip nang malalim.
Maya-maya, heto ka na naman at sa akin umaaligid. Tinangka kitang huliin ngunit di ko
muling nagawa. Muli akong nahiga at nag-isip nang nag-isip.
Maya-maya uli, bumagon ako at pinatay ang ilaw, nahiga at nagsisimula na sana
akong matulog nang maramdaman kong nangati ang aking mukha. Napatampal ako at
napatay kita. Sumambulat ang dugo sa katawan mo. Dahil doon, tuluyan akong hindi
nakatulog. Sumaisip ko na naman ang suliraning bumabagabag sa akin at sa hindi
sinasadya'y naging bahagi ka rin ng isipang yaon.
Ikaw na isang lamok lamang ay naihambing ko sa mga taong nagbabalatkayo sa
kanilang katauhan. Katulad mo ring sumisipsip ng dugo, lagi silang nakakapit sa akin
kapag nangangailangan at kapag may nakamit akong tagumpay. Laging maganda ang
sinasabi sa akin kapag kaharap ko.
Tulad mo rin na kunwa'y aali-aligid kapag nakabukas ang ilaw. Nang pinatay ko
ang ilaw ay saka lamang lumapit sa akin, kinagat at pinapak ang aking dugo.
Ganon din sila, na kapag bumagsak ako sa aking kinalalagyan at hahanap-hanapin ko
sila sa aking tabi, wala na. Kapag nakatalikod ako, kung anu-anong masamang bagay
ang sinasabi nila tungkol sa akin na ikinasasakit ng aking kalooban. Sa aking panimdim,
wala man lamang ni isa sa kanilang umaaliw sa akin. Sa ganoong pagkakataon ko
nakikilala ang tunay nilang pagkatao at ang mga dungis nila ay sa ganoong
pagkakataon ko rin natutuklasan.
Ganoon din nga pala, nagising ako sa katotohanan na ang mga tao palang iyon
ay huwad at siyang nagbigay sa akin ng aral ukol sa pakikitungo sa kapwa. Ang
katotohanang iyon ang nagdulot sa akin ng tatag ng loob na pumili ng aking
kakaibiganin.
Bakit ganyan ka, Munting Lamok? Kapag may ilaw ay aali-aligid lamang na parang
nilalaro mo ako, ngunit kapag nasa kadiliman, nangangagat ka! Hindi ka marunong
mamuhay nang hindi aasa sa iba. Bakit nga ba?

Page 10 of 13
 A, hindi bale na lamang. Kahit magkagayo'y nagpapasalamat pa rin ako.
Itinuturing pa rin kitang kaibigang nagmulat sa akin sa katotohanan.
Maraming salamat, Kaibigang Lamok.

Sanaysay

Ikahuling taon ko na sa Internasyonal na Bakaluryat(IB) pagbalik ko sa paaralan

sa huling parte ng Agosto. Ibig sabihin magtatapos na ako eksaktong isang taon mula
ngayon ngunit bago iyon kailangan ko pang maghirap at magdusa ng isang pagkahaba-
habang taon sa IB! Napakarami naming gagawin at isa na doon ang tinatawag na
Mahabaang Sanaysay. Lahat ng mga mag-aaral ng IB ay kailangang magsulat nitong
sanaysay na ito upang makapagtapos. Hindi lang ito pangkaraniwang sanaysay,
maraming preparasyon ang dapat gawin para dito. Malaya kaming mga mag-aaral na
pumili ng aming mga paksa. At hulaan ninyo ang pinili ko: ang walang-kamatayang
KIMIKA! hahaha.
Ngayong bakasyon, kinakailangan na naming magsimula at maghanda para sa
nabanggit na sanaysay. Kungkaya't kailangan ko nang magbasa tungkol sa gagawin ko.
Ang gagawin ko nga pala ay tungkol sa lýsi o ika nga sa tagalog, mantika ng atay ng
isda na mayaman sa omega 3 na matatabang asido (haha palakpakan ang aking
napakadalubhasang pagsasalin!). Hindi ko pa nga lang alam kung anong tiyak na
pagsasaliksikan ko tungkol doon dahil kailangan ko pang pakitirin ang aking nasabing
paksa.
Sa totoo lang, interesado rin talaga ako tungkol dito sa paksang ito at hindi ako
makapaghintay na gawin ang aking eksperimento. Ang tanong, ano naman kayang
eksperimento gagawin ko tungkol dito. Hayyyy. May dalawang buwan pa ako para mag-
isip at manaliksik.
Kaya isa pa siguro ito sa mga mahahalaga kong gagawin ngayong bakasyon
bukod sa pagtatrabaho.
Ang saya ng buhay ko 'no?
Oo ka na lang.

TULA SA SANAYSAY

ni Lilia Quindoza Santiago

Page 11 of 13
Sining ang sanaysay
Isang tula sa kalawakan ng malay.
Dito, sinusukat ang saklaw ng kaalaman
Tinutugma ang liwanang ng isip, luwalhati ng puso,
Sa pagdaloy ng mga salita,
Sa paglilinaw ng mga haraya
Sa paghahawan ng salimuot sa daigdig
Na patuloy na umiinog sa mga tanonguzeliserio.blogspot.com
Walang hanggang katanungan
Na walang iisang katugunan.
Tula ang sanaysay
Pagpapalawig ng ulirat sa malayang kadiliman
Pagpapanumbalik ng tibok sa nakaambang kamatayan
Isang bukas na larangang bukas sa lahat
Tula ang sanaysay
Sa kanyang anyo
Sa kanyang sarili
Sa kanyang salaysay
Sa kanyang kasaysayang lumingap
Sa mundong lagi’t laging may tinutuklas
Iisa ang tula at sanaysay sa kanilang pakay:
Iluklok ang Bathala ng karunungan at pagmamahal
Sa lahat ng bagay.

Sanaysay
"Dayuhan"

Ako si Neneng, 55 --- babae, may asawa at walang anak.  matagal na ako dito sa
Amerika - mula pa noong 1984 - isa na akong manunulat - sa komiks, diario, pelikula at
tv., bago ako lumipad papunta sa lugar na ito - mapa-English, at mapa-tagalog, gusto
kong magsulat.  Hindi naman ako sikat na sikat pero kilala naman, kaya lang pinili kong
umalis kasi noon ay walang kalayaan, wala akong pera para tustusan ko ang aking
sining.

Saan Patungo ang Buhay?

Gasgas man, uuliting ko pa rin. Tayo raw ang may akda ng sarili nating buhay. Tayo
ang may control sa manibela. Hindi raw ito isang kapalaran na nakasulat na. Nasa atin
pa rind aw ang kapangyarihang pumili ng landas na ating tatahakin.

Page 12 of 13
Malinaw naman ang punto. Kung ano ang ginagawa natin ngayon, iyon ang hahabi sa
kung anong buhay magkakaroon tayo sa hinaharap. At ang buhay naatin ngayon ay
bunga ng buhay na pinili natin kahapon.

Wikang Filipino

Wala na ngang mas hihigit pa sa pagtangkilik sa sariling wika para sa isang manunulat.
Hindi ko sinasabi na dapat lahat ng Pinoy na manunulat ay Filipino ang ginagamit na
salita sa paghabi ng kanilang mga sulatin. Pero dapat ang ating wika ang maging
unang tuntungan natin sa pag-akyat sa hagdanan ng pagsusulat.

Prepared by:

ODYLON P. VILLANUEVA
DALSC

Page 13 of 13