tungkol sa kasal

• huwag mong isusukat ang damit pangkasal, baka hindi ito matuloy

tungkol sa patay

• bawal maghatid sa labas ng mga dumalaw sa burol

• pagkatapos mong dumalaw sa isang burol, magpagpag ka muna. tumambay ka mun sa ibang lugar bago
umuwi ng bahay, para hindi mo rin maiuwi ang kaluluwa ng namatay o ng iba pa

tungkol sa pag-aasawa

• bawal kumanta habang nagluluto. sinumang kumanta habang nagluluto ay hindi na makapag-aasawa.
• bawal umalis sa hapag kainan nang hindi pa tapos kumain ang lahat. kapag may umalis at hindi pa tapos
kumain ang lahat, sinumang wala pang asawa ay hindi na mapag-aasawa pa kailanman.

tungkol sa bantang may masamang mangyayari o aksidenteng magaganap o kamatayan

• kapag napabahing sa hagdan bago bumaba ng bahay, huwag nang tumuloy.

• bawal umalis sa hapag kainan nang hindi pa tapos ang lahat. kung hindi maiiwasan, paikutin ang mga pinggan
ng lahat ng hindi pa tapos kumain upang makaiwas sa aksidenteng nagbabadya.
• bawal maggupit ng kuko kapag gabi na.
• kapag napanaginipan mong binubunutan o nabubunutan ka ng ngipin, may mamamatay kang kamag-anak.
kailangan mong ikagat ito (ang mga ngipin) sa anumang puno upang hindi maganap ang kamatayan at malipat
dito ang banta ng kamalasan.
 Bahay ni Juan dela Pamahiin

Isang pananaliksik papel tungkol sa mga pamahiin sa bahay ng iba’t ibang kultura.

Cruz, Shiela Marie S.; Labatete, Kevin Jan G.; Leocadio, Joanne Razel T.;
Nonog, Ma. Donna Erica Q.; Urbano, Alyssa Marie R.; Vidad, Angela Marie A. mula
sa klase ng 1BSN4, UST Kolehiyo ng Nursing, T.A. 2008-2009. Sa patnubay ni Gng.
Zendel Taruc.

Ang bahay ay isang mahalagang bahagi sa

pagbubuklod ng isang pamilya. Ito ay ang pinakapinagtutuunan
ng pansin at isa sa mga prayoridad sa pagbuo ng isang mag-
anak. Sa paglipas ng panahon, marami ang nausong paraan kung paano aayusin at
pagagandahin ang bahay. Karamihan sa mga Pilipino, mapa-Luzon, Visayas o
Mindanao man, ang pamahiin ang isa sa mga nakagawian nang paraan upang
magdulot ng katiwasayan, seguridad at swerte sa tahanan.

LAYUNIN

Sa pagdaan ng panahon, marami sa pamahiing Pilipino ay

naimpluwensyahan at naiambag lamang ng ibang bansa. Dahil dito, naisip ng mga
mananaliksik na magtala ng mga kakaibang pamahiin sa bahay mula sa iba’t ibang
rehiyon sa Pilipinas. Layunin nito na ipakita ang pagkakaiba ng mga pamahiin ng
iba’t ibang kultura.

MGA KAUGNAY NA LITERATURA

I. Ano ang pamahiin?

 Ang pamahiin ay ang walang basehang paniniwala sa isang bagay o
pangyayari na makakaapekto sa isa pang pangyayari kahit wala silang relasyon sa
isa’t-isa (Eliese 2008).

Ayon naman kay Oblena (2008), ang pamahiin ay isang gabay o batayan, na
sa tamang paggamit ay maaaring magbigay ng magandang kapalaran, lakas ng loob
o dagdag na paniniwala sa iyong sarili.

Para kay Brunvand (1998), manunulat ng The Study of American Folklore,

ang pamahiin ay paniniwala, kaugalian, pamamaraan at pagpapalagay na
kadalasang may kinalaman sa kalikasan ng mga sanhi at bunga.

II. Pamahiin sa Kulturang Pilipino

Ang mga Pilipino ay likas na may malaking paniniwala sa mga pamahiin. Ito
ay isang malaking bahagi na ng ating kultura at nakakaimpluwensiya sa mga
pananaw at iba’t ibang pangyayari sa ating buhay. Sa sobrang lakas ng paniniwala
ng mga Pilipino sa mga pamahiin, hindi ito nakayang baliin ng Kristiyanismo at hindi
nagawang tanggalin ng siyensya at teknolohiya.

Ayon kay Dr. Sonia M. Zaide (1999), manunulat ng “The Philippines: A

Unique Nation,” naimpluwensiyahan ng iba’t ibang bansa at kultura ang ating mga
pamahiin. Ang ilang halimbawa nito ay ang India, Tsina, at Peru. Ang may
pinakamalaking naging impluwensiya sa ating mga pamahiin at paniniwala ay ang
mga Espanyol.

III. Mga Pamahiin sa Bahay mula sa Iba’t ibang Kultura

Isa sa mga partikular na pinagtutuunan ng pansin ng mga Pilipino ay ang

bahay. Ang bahay ay naikokonekta sa pamilya kaya’t napakahalaga nito sa mga
Pilipino. Sa bahay nailalaan ang pinakamalaking bahagdan ng ating oras
kaya’t hangga’t maari, gusto ng mga Pilipino na ito ay maging komportable at
mailayo mula sa malas at masasamang espiritu.

1) Ilokano
 a) Huwag magwawalis ng tingting sa gabi upang
hindi magdahop sa kabuhayan.

b) Kapag may bumahing habang ikaw ay paalis na ng iyong

bahay, huwag mo nang ituloy ang iyong lakad dahil baka may sakunang mangyayari
sa iyo

c) Malas ang kumain sa ilalim ng hagdan

2) Kapampangan

Kapag nagluluto sa loob ng bahay, huwag kumanta dahil maagang mababalo.

3) Bisaya

a) Tuwing matutulog dapat kapitan ng karit ang mga pintuan at

bintana at sa panahon ng mahal na araw, dapat magsaboy ng
kaunting asin sa trangkahan.

b) Bawal umupo sa hagdanan kapag may regla.

c) Bawal kumanta sa hapag kainan dahil ang pagkain na galing sa

langit ay ninanamnam.

4) Ilonggo

a) Bawal sumipol sa gabi dahil nakakatawag-pansin ito ng mga

maligno.

b) Kapag may bagong bahay, maglagay ng mga barya sa mga mga bintana
para swertehin.

5) Batangueño

Kapag may buntis sa bahay, bawal umupo sa may pintuan dahil

mahihirapan manganak.
PAGLALAHAD NG SARILING PAG-AARAL

METODOLOHIYA

Ang pamamaraang ginamit ng grupo upang makakalap ng datos ay ang

pananaliksik at panayam. Para sa pananaliksik, gumamit ang grupo ng mga libro at
ng internet. Ang mga mananaliksik ay nakipanayam sa tatlong respondente na
nagmula sa iba’t ibang rehiyon sa Pilipinas na may kanya-kanyang opinyon ukol sa
pamahiin.

PRESENTASYON, INTERPRETASYON AT PAGSUSURI NG DATOS

Ang unang kinapanayam ng grupo ay isang madre ng

Holy Family Dormitory na nagngangalang Sr. Lerma Serdone,
tatlumpu’t dalawang taong gulang na mula sa Quezon Province. Nang tanungin kung
siya ay naniniwala ba sa mga pamahiin, ito ang kanyang naging tugon: “Hindi, kasi
kung ikaw ay isang Kristyano at matibay ang iyong pananampalataya, hindi ka
maniniwala kasi isa lang ang dapat mong paniwalaan, ang Diyos lang.”

Tinanong din ng grupo kung para sa kanya ba ay masamang maniwala sa

mga pamahiin. “Kung iyan ay hindi makabubuti sa iyong pamumuhay at sa pagiging
tao mo, hindi ka dapat maniwala.” Dagdag pa niya, “Hindi mo kasi masisisi ang mga
naniniwala. Una sa lahat, kulang sila sa impormasyon. Malakas ang impluwensya ng
mga sabi-sabi. Halimbawa sa bahay, kung naniniwala ang lola mo, ikaw na apo ay
maniniwala rin kasi meron kang pruweba. Ang mga nangyayaring co-incidence o
pagkakataon sa mga taong katulad niyo na hindi madre o pari ay agad ikinakabit sa
pamahiin.”

Ikinuwento pa niya na, “Ang mga magulang ko ay naniniwala sa mga

ganyang bagay. Noong bata pa ako, naniniwala rin ako kasi iyon ang nakikita ko sa
bahay namin. Pero sa bandang huli, hindi na.”

Ang ikalawang kinapanayam ng grupo ay si Ginang Escolastica Nonog,

apatnapu’t siyam na taong gulang. Siya’y nagmula sa Leyte at kasalukuyang
naninirahan sa Cavite.
 Nang tanungin ng grupo kung anu-ano ang kanyang alam na mga pamahiin,
narito ang ilan sa kanyang mga nabanggit: (1)Bago magpatayo ng bahay, kailangang
magpadugo muna ng manok o di kaya’y baboy. (2)Sa paglipat, kailangang kabilugan
ng buwan at hindi tuwing bagong buwan (new moon). (3)Kailangang magdasal ng
rosaryo, simulan habang palipat at tapusin sa lilipatang bahay.(4)Hangga’t maaari,
bago dapat ang kama o di naman kaya ay ang mga kobre kama.

Nang hingin ng grupo ang kanyang tugon ukol sa pagsunod sa mga

pamahiin maging sa sariling tahanan, narito ang kanyang sagot: “Hindi gaano,
ngunit wala namang masama kung susundin ang mga pamahiin na iyon. Ang iba ay
sinunod ko ngunit ang iba tulad ng ‘dapat nakaharap sa silangan ang bahay’ ay hindi
na nasunod dahil walang mabiling lote na nakaharap sa silangan.”

Bago magwakas ang pakikipanayam ng grupo, nabanggit niya na: “Wala

naman yata iyan sa pamahiin. Diyos talaga ang nakakaalam at magsumikap ka
lang, ika nga, ‘success will follow’.”

Isa rin sa kinapanayam ng grupo ay si Ginang Alicia Vidad, limampu’t isang

taong gulang, nakatira sa Lungsod ng Muntinlupa. Siya ay lumaki sa Ilocos Norte.
Isa siya sa mga respondenteng naniniwala sa pamahiin.

Nang tanungin ng grupo kung paano nakatutulong ang pagsunod sa

pamahiin sa kanilang pamilya, ito ang kanyang naging tugon, “Malaki rin ang
naitututlong nito, kasi magaan ang pakiramdam mo na sinunod mo ang pamahiin at
hindi mo sisisihin ang sarili mo kung ano man ang mangyari sa loob ng bahay.
Pwede rin itong panakot sa mga bata. Kunyari sinasabi ko sa anak ko na bawal
magputol ng kuko sa gabi. Sa aming paniniwala, kapag ginawa mo ito ay may
mamamatay. Kung hindi naman ito totoo, ayos lang kasi delikado naman talaga ang
magputol ng kuko sa gabi. At kung totoo man ang mga pamahiin, maaaring
makaiwas sa malas at madagdagan pa ang swerte ng pamilya.”

Naungkat din ng grupo kung nasusunod ba nila ang lahat ng mga ito. “Yung
iba, hindi nasusunod kasi matrabaho at kailangang may superbisyon ng mga
matatanda kasi sila ang eksperto pagdating sa ganyang mga
pamahiin.”

Sa kabila ng pagiging matrabaho at paminsan-minsan ay

mabusisi ang pagsunod sa mga pamahiin, hindi ito naging
balakid sa pagsunod nila. Eto ang kanyang naging pahayag:“Katulad na lamang
kapag bagong taon, maraming pamahiinang kailangang masunod. Halimbawa,
kailangang bumili ng labintatlong prutas, kahit na maliit ang badyet, pagkakasiyahin
pa rin para makumpleto ang mga ito.”

Kahit na maraming makabagong teknolohiya at halos lahat ng bagay ay may

siyentipikong basehan na, pinahahalagahan pa rin ni Gng. Vidad ang mga
ito.“Siyempre! Minsan nga, natatawa na lamang ang aking mga anak tuwing
pinapaalalahanan ko sila na huwag magwalis tuwing gabi kahit na sobrang kalat.
Kaya ko ibinabahagi sa kanila, kasi maaari namang may katotohanan ang mga ito.
Kung wala, eh di parang ibinahagi ko na rin ang isa sa pinakamahalagang bahagi ng
kultura ng mga Pilipino.”

KONKLUSYON

Tunay ngang malaking bahagi ng kulturang Pilipino ang pamahiin.Batay sa

mga nakalap na datos ng mga mananaliksik, mahihinuha na hindi nalalayo ang mga
pamahiin ng iba’t ibang lugar at kultura. Masyadong ispesipiko ang mga pamahiin at
maraming kailangang gawin masunod lamang ito. May mga taong malakas ang
paniniwala sa pamahiin na ginagwa talaga nila ang lahat, sa abot ng kanilang
makakaya, para masunod ito. Kahit na minsa’y mahirap at minsa’y nanganailangan
pa ng malaking halaga. Mayroon din namang mga tao na sinusunod lamang ang
mga pamahiin na madadali o iyong kaya nila at hindi na gaanong pinag-uukulan ng
pansin, o dagdag na panahon, ang mga pamahiin na mahihirap.

REKOMENDASYON

Ang pananaliksik na ito ay maaaring ipagpatuloy sa pamamagitan ng

pagkakaroon ng ibang pokus tulad ng pamahiin sa iba’t ibang okasyon, pagkain, at
iba pang pang-araw-araw na gawain. Maaari ring patunayan ng susunod pang
mananaliksik kung totoong nagdudulot ang pamahiin ng swerte.